هى مصر فين.؟.؟!!...&

من طرف lenda الثلاثاء مارس 17, 2009 5:02 pm

جايبالكم كلمات زجل يارب تعجبكم......
.....
فيوم من الايام قام عم على قلقان

وخايف يصحى م النوم

مايلقاش مصر

طيب يا سيدى بص حواليك

وقولى

هى فين مصر؟

خايف لـ الصبية

تهرب م الديابة

وتلم الهرم والنيل

وعليها الهدمتين

ياراجل قول كلام غير دة

مصر هربت من زمان

واللى باقى منها ..

ذكرى فى القلب

وشوية حنين
Shocked

مصر لوحة أصلية

أصيلة ..

سرقوها الحرامية

وسابولنا لوحة مزيفة

نسخة.. تقليد رخيص

لا تملا مكانها فى القلب

ولا منظرها يسر العين
Shocked

مصر يا أخويا

بقت مقسومة نصين

واللى كانوا نص فى المية

بقوا يادوب الربع

يعنى تُمنين

تمن رجال أعمال

وتمن تشكيلة

ضباط … وكلاء …على سياسيين

برضه برجال الأعمال مربوطين

والباقى لامن دول ولا من دول

الباقى هم الملح

بين الرحى مطحونين

دة مش لاقى وظيفة

ودة عايز جوازة

وابن المحظوظة دى بقى اتجوز

بس دايما مستدين

ازاى يكفى مراته

ودوا ضغط لأبوه

والسكر لأمه

غير مصاريف العيال

وطلبات المدرسين

أما الباشا متسألش عليه

قاعد فى مارينا..

قدام الشط ممدد رجليه

بيصرف فى فلوس أهالينا

ولو اتكلمنا

فوق دماغنا بيدينا

طيب نسكت بالذوق

ولا واحنا مضروبين

وكوتشينة .. إلعب

تلات ورقات .. جرب

أراهنك هتكسب

هم تلات وزارات!! ..

آسف.!.. قصدة ورقات

قول فلوسك فين

أيوة .. باتكلم ع التأمينات

فلوس الناس الشقيانة سنين

اللى طلع على المعاش

واللى عمره ما عاش

سرقوا من عمره اللحظة

ومن حياته البهجة

بص انت على موظف

و أنا راضى بحكمك

بقى دول ناس عايشين؟

وقالوا فلوسكم فى الخزنة

متستفة اكوام اكوام

راحوا الغلابة يقبضوا

لقوها أوهام

ياعينى ع اللى حب ولا طالش

وعاش وما عاشّ

ومات .. ما اندفنش

وعينى عليكى يا بلدى

خدوكى منى

وسابونى تايه ..

خايف..

حزين

يا عم على يا أبو سلامة

ماترد وتقولى

هى مصر فين
؟؟؟؟؟؟؟؟؟؟؟